រយៈពេល៩ខែនៃការពោះពោះ ស្ត្រីត្រូវឆ្លងកាត់ឧបសគ្គ និងបទពិសោធន៍ជាច្រើនដែលប្រុសៗមិនអាចយល់ឡើយ។ ស្របពេលជាមួយគ្នានេះ ស្ត្រីភាគច្រើនតែជួបប្រឈមនឹងបញ្ហាក្អួតចង្អោរ ដែលគេហៅថាចាញ់កូន ហើយមានអ្នកខ្លះអាចចាញ់រហូតដល់ថ្ងៃកើតក៏មានដែរ។ ដើមហេតុចម្បងដែលបង្កឲ្យមានបញ្ហានេះ គឺការប្រែប្រួលនៃកម្រិតអ័រម៉ូន Estrogen និង Progesterone ខ្លាំងពេក។
សូម្បីតែក្លិនមនុស្ស ឬចំណីអាហារក៏អាចធ្វើឲ្យស្ត្រីមានផ្ទៃពោះចង់ក្អួតចង្អោរបានដែរ។ តែយ៉ាងណាក៏ដោយ អាការចាញ់កូននៅត្រីមាសដំបូងអាចដោះស្រាយបាន ប្រសិនបើស្ត្រីមានផ្ទៃពោះអនុវត្តតាមវិធីសាមញ្ញៗមួយចំនួននេះ។
១.ទំពារខ្ញី
នៅពេលមានអាការចង់ក្អួតចង្អោរ អ្នកត្រូវយកខ្ញីមួយចំណិតតូចមកទំពារ ដោយសារតែក្លិន និងរសជាតិរបស់វាអាចទប់ស្តាត់បញ្ហានេះបាន។ ម្យ៉ាងវិញទៀត អ្នកអាចទទួលទានតែខ្ញីមួយពែងជារៀងរាល់ព្រឹក ក៏អាចជួយការពារបានដែរ។
២.ទទួលទានទឹកក្រូចឆ្មារ
ក្រូចឆ្មារ មិនត្រឹមតែអាចជួយបង្ការអាការក្អួតចង្អោរប៉ុណ្ណោះទេ វាក៏មានផ្ទុកវីតាមីន C ដែលអាចជួយឲ្យអ្នកម្តាយ និងកូនមានសុខភាពល្អផងដែរ។ ដើម្បីមានប្រសិទ្ធភាព អ្នកត្រូវយកក្រូចឆ្មារមួយចំណិតច្របាច់ចូលទៅក្នុងទឹកក្តៅឧណ្ឌៗមួយកែវ ហើយបន្ថែមទឹកឃ្មុំមួយស្លាបព្រាបាយចូល។ បន្ទាប់មកទទួលទានបន្តិចម្តងៗរហូតទាល់តែអស់។
៣.ទទួលទានសារធាតុរាវឲ្យបានច្រើន
មធ្យាបាយដ៏ល្អបំផុតក្នុងការទប់ទល់នឹងភាពអស់កម្លាំងដោយសារតែអាការក្អួតចង្អោរ គឺការទទួលទានទឹកឲ្យបានច្រើន។ ស្ត្រីមានផ្ទៃពោះត្រូវចាំថា ការទទួលទានទឹកឲ្យបានមួយកែវក្នុងរយៈពេលមួយម៉ោង អាចបង្ការអាការចង់ក្អួតចង្អោរបាន ហើយអាចរក្សាសំណើមក្នុងរាងកាយបានថែមទៀត។
ទទួលទានអាហារតិច តែឲ្យបានច្រើនដង
អំឡុងពេលមានផ្ទៃពោះ ស្ត្រីត្រូវការអាហារបំប៉នគុណនឹងពីរ ដើម្បីបំពេញតម្រូវការទារក្នុងផ្ទៃកំពុងតែលូតលាស់។ ក៏ប៉ុន្តែក្នុងអំឡុងពេល៣ខែដំបូងនេះ អ្នកមិនអាចទទួលទានម្តងច្រើនៗបាននោះទេ ព្រោះវាអាចធ្វើឲ្យក្អួតចង្អោរ។ ដូច្នេះ អ្នកគួរតែទទួលទានអាហារម្តងបន្តិចៗរៀងរាល់ ២ទៅ៣ម៉ោងម្តង ដើម្បីកុំឲ្យក្រពះចាល់ជាតិអាស៊ីត តែកុំភ្លេចបន្ថែមផ្លែឈើក្នុងរបបអាហារផង៕
