ការប្រើប្រាស់ថ្នាំអំឡុងពេលតាំងគភ៌ ពិតជាប្រឈមនឹងគ្រោះថ្នាក់ខ្លាំងបំផុតសម្រាប់ទារក ព្រោះវាអាចធ្វើឲ្យទារកកើតមកខ្សោយប្រព័ន្ធភាពស៊ាំ ខ្សោយខួរក្បាល ហើយអាចរលូតកូនថែមទៀត ប្រសិនបើអ្នកប្រើប្រាស់ដោយគ្មានវេជ្ជបញ្ជារ។
ចុះក្នុងករណីដែលស្ត្រីតាំងគភ៌មានអាការក្តៅខ្លួន តើត្រូវធ្វើបែបណា? ក្រៅពីទៅជួបគ្រូពេទ្យដើម្បីរកដំណោះស្រាយ ស្ត្រីតាំងគភ៌អាចប្រើវិធីធម្មជាតិបាន ព្រោះវាមិនបង្កផលអាក្រក់ឡើយ។ ខាងក្រោមនេះជាវិធីធម្មជាតិ ដែលអាចជួយកាត់បន្ថយកម្តៅរបស់ស្ត្រីតាំងគភ៌ ដោយគ្មានផលប៉ះពាល់ឡើយ៖
ញ៉ាំទឹកឲ្យបានច្រើន៖ រាងកាយរបស់យើងគ្រប់គ្នាត្រូវការទឹកជាចាំបាច់ ជាពិសេសនៅពេលអាកាសធាតុក្តៅ ហើយចំពោះស្ត្រីតាំងគភ៌ដែលមានអាការក្តៅខ្លួនក៏ត្រូវការទឹកដូចគ្នាដែរ ព្រោះវាអាចជួយកាត់បន្ថយកម្តៅក្នុងរាងកាយបាន។ នៅពេលដែលអ្នកដឹងថា រាងកាយមានសីតុណ្ហភាពកើនឡើងភ្លាម ស្ត្រីតាំងគភ៌ គួរទទួលទានទឹកឲ្យបាច្រើន ឧស្សាហ៍លាងមុខ ឬងូតទឹកឲ្យបានញឹកញាប់។
ញ៉ាំទឹកដូង៖ អ្នកជំនាញបានណែនាំថា ស្ត្រីមានផ្ទៃពោះ គួរទទួលទានទឹកឲ្យបានតិចបំផុតមួយថ្ងៃ១កែវ ដោយសារតែសារធាតុអេឡិចត្រូលីត្ររបស់វាមានច្រើនជាងសារធាតុរាវផ្សេងៗទៀត។ ក្រៅពីនេះ ទឹកដូង អាចធ្វើឲ្យរាងកាយមានភាពត្រជាក់ ហើយជៀសផុតពីជំងឺគ្រុនផ្តាសាយ។
អាស្រ័យហេតុនេះ ប្រសិនបើស្ត្រីមានគភ៌ទាំងឡាយចាប់ផ្តើមមានអាការក្តៅខ្លួនភ្លាម ត្រូវធ្វើរឿងពីរចំណុចខាងកលើនេះ ឬក៏ប្រញាប់ពិគ្រោះជាមួយវេជ្ជបណ្ឌិតដើម្បីជៀសវាងការប្រើប្រាស់ថ្នាំខុស៕
