ទោះបីជាមានការផ្សព្វផ្សាយជាច្រើនទាក់ទងទៅនឹងគ្រោះថ្នាក់នៃការជក់បារីចំពោះសុខភាពក៏ដោយ ប៉ុន្តែទម្លាប់មួយនេះហាក់ដូចជាកើនឡើងទៅវិញចំពោះយុវជន រួមទាំងស្ត្រីមានផ្ទៃពោះផងដែរ។ ហេតុអ្វីបានជាការជក់បារីអាចបង្កគ្រោះថ្នាក់ខ្លាំងសម្រាប់ស្ត្រីមានផ្ទៃពោះ? ហេតុផលងាយយល់បំផុត គឺបារីមានផ្ទុកជាតិនីកូទីន ឧស្ម័នកាបូម៉ូណូអុកស៊ីត និងសារធាតុពុលផ្សេងៗរាប់រយប្រភេទទៀត ដែលត្រូវបានស្រូបចូលទៅក្នុងខ្លួនអ្នកម្តាយ ហើយផ្ទេរទៅកូនតាមរយៈចរន្តយឈាមដោយផ្ទាល់។ ដូច្នេះ ទារកអាចប្រឈមនឹងគ្រោះថ្នាក់ ៧ចំណុច៖
– ទារកខ្វះអុកស៊ីសែន ដែលត្រូវបញ្ចូនពីម្តាយ
– ទារកអាចបង្កើនហានិភ័យរលូត
– ទារកអាចប្រឈនឹងជំងឺផ្លូវដង្ហើមពេលកើតមក
– ទារកអាចកើតមិនគ្រប់ខែ ឬមានទម្ងន់ស្រាលជាងទារកដែលកើតចេញពីម្តាយមិនជក់បារី
– ទារកអាចស្លាប់ក្នុងផ្ទៃដោយមិនដឹងខ្លួន
– ទារកអាចប្រឈមនឹងពិការភាពពីកំណើត
– ទារកអាចមានអត្រានៃចង្វាក់បេះដូង លោតញាប់ខុសពីទារកធម្មតា
ដូច្នេះ ដើម្បីជៀសហានិភ័យផ្សេងៗចំពោះទារក ក៏ដូចជាសុខភាពខ្លួនឯង អ្នកម្តាយទាំងឡាយគួរឈប់ជក់ពីបារី ឬកុំទៅក្បែរអ្នកជក់បារីឲ្យសោះ៕
