ការកម្រើករបស់ទារកនៅក្នុងផ្ទៃ គឺជាសញ្ញាបញ្ជាក់ពីសុខភាពមាំមួន ឬភាពទន់ខ្សោយដែលត្រូវប្រឈមនឹងគ្រោះថ្នាក់។ ម៉ាក់ប៉ាទាំងឡាយគួរតែយកចិត្តទុកដាក់ចំពោះការកម្រើករបស់ទារក ប្រសិនបើពួកគេមានភាពមិនប្រក្រតី ត្រូវដោះស្រាយយ៉ាងដូចម្តេច។
តើពេលណាដែលទារកចេះកម្រើក?
ភាគច្រើនអ្នកម៉ាក់ដែលមានផ្ទៃពោះ នឹងចាប់ផ្តើមមានអារម្មណ៍ថា ទារកកម្រើកនៅអាយុ ១៦ទៅ២០សប្តាហ៍។ បើអ្នកចង់ឃើញទារក ត្រូវទៅអូសអេកូ ប៉ុន្តែរូបភាពមិនទាន់មើលឃើញច្បាស់នោះទេ។ វាមើលទៅដូចជាដុំសាច់តូចមួយ ធ្វើឲ្យយើងមិនអាចមើលដឹងពីចលនាឡើយ។ ចូលដល់សប្តាហ៍ទី ២០ ទារកអាចបត់បែនបាន ហើយធាក់ពោះអ្នកម៉ាក់ថែមទៀត។
បើទារកមិនកម្រើក តើមានគ្រោះថ្នាក់ឬទេ?
សញ្ញានៃការកម្រើកអាចបង្ហាញពីសុខភាពរបស់ទារកដែលមិនទាន់កើត។ អ្នកម៉ាក់ត្រូវចេះសង្កេតមើលបន្ទាប់ពីសប្តាហ៍ទី២០ ប្រសិនបើកូនមានចលនាកម្រើកតិច ឬស្ទើរតែគ្មានពេញមួយថ្ងៃ ត្រូវព្យាយាមសង្កេតមើលខ្លួនឯងថា ក្នុងអំឡុងពេលនេះអ្នកមានភាពតានតឹងខ្លាំងឬអត់។ ព្រោះភាពតានតឹងខ្លាំង អាចរំខានដល់ការផ្តល់អុកស៊ីសែនទៅកាន់ទារក។ ដូច្នេះសូមព្យាយាមសម្រាកមួយថ្ងៃ ប្រសិនបើវាមិនធូរស្រាល សូមទៅជួបគ្រូពេទ្យដើម្បីរកដំណោះស្រាយបន្ថែម។ បើបណ្តែតបណ្តោយយូរ អ្នកអាចប្រឈមនឹងការបាត់បង់កូន។
តើធ្វើដូចម្តេចដើម្បីគ្រប់គ្រងបញ្ហាទារកមិនកម្រើក?
សង្កេតមើលរោគសញ្ញានៃការកម្រើករបស់ទារក បន្ទាប់ពីអ្នកម៉ាក់ញ៉ាំអាហារ និងពេលក្រោយពីគេង ប្រសិនបើទារកមានការកម្រើកតិច គួរធ្វើដូចខាងក្រោម៖
១.អ្នកម៉ាក់ត្រូវញ៉ាំអាហារផ្អែម។
២.រងចាំរយៈពេល ២ទៅ៣នាទី ដើម្បីមើលរោគសញ្ញារបស់កូន។
៣.បើមិនមានការឆ្លើយតប ម្តងទៀតសូមសាកល្បងស្តាប់ភ្លេង។ ការស្តាប់ភ្លេងបណ្តើរ ហើយព្យាយាមយកដៃសង្កត់ពោះថ្នមៗ ដើម្បីដឹងថាតើទារកឆ្លើងតបវិញឬទេ?
៤.កុមារមិនកម្រើក ពេលខ្លះដោយសារតែពួកគេគេងលក់។
៥.ការកម្រើកជាធម្មតាមិនគួរតិចជាង ១០ដងក្នុងរយៈពេល ២ម៉ោង។
៦.ប្រសិនបើអ្នកធ្វើតាមជំហានទី១ ដល់ទី៣ ហើយទារកនៅតែមិនកម្រើកទៀត គួរតែទៅជួបពេទ្យជាបន្ទាន់។
