ការស្រាវជ្រាវថ្មីមួយបានរកឃើញថា ការសម្រាលកូនតាមទ្វារមាស គឺមានសុខភាពល្អជាងវិធីសាស្ត្រដទៃទៀត។ ហេតុផលនៅពីក្រោយរឿងនេះ គឺវាអាចជួយផ្ទេរមីក្រូជីវសាស្ត្រទៅឲ្យទារក។
អ្នកវិទ្យាស្ត្រនិយាយថា ការផ្ទេរនេះប៉ះពាល់ដល់ភាពស៊ាំរបស់ទារកទើបនឹងកើត។ ប្រសិនបើមានការរំខាន ឬអតុល្យភាពអតិសុខុមប្រាណណាមួយក្នុងអំឡុងពេលសម្រាល អាចបង្កបញ្ហាច្រើនដល់សុខភាពទារក។
តើមីក្រូជីវសាស្ត្រ គឺជាអ្វី? តាមពិតមីក្រូជីវសាស្ត្រ ជាពាក្យដែលគេប្រើសំដៅទៅលើអាណានិគមនៃពពួកបាក់តេរី និងអតិសុខុមប្រាណ ដែលផ្ទុកក្នុងរាងកាយរបស់យើង។ ពួកវាត្រូវបានគេសំដៅលើបាក់តេរីល្អៗមួយចំនួន ដែលដំណើរការពីពោះវៀនរបស់យើងគ្រប់គ្នា។
អ្វីដែលយើងស្ទើរតែមិនធ្លាប់ដឹង គឺអតិសុខុមប្រាណតូចៗទាំងនោះមានច្រើន សម្រាប់ជីវិតរស់នៅរបស់យើង។ សុខភាព និងភាពស៊ាំរបស់យើងអាស្រ័យលើពួកវានេះហើយ។ កត្តាដូចជារបបអាហារ ការធ្វើលំហាត់ប្រាណ និងស្ត្រេស ក៏អាចជះឥទ្ធិពលដល់បាក់តេរី និងប៉ះពាល់ដល់ភាពស៊ាំរបស់យើងដែរ។
នេះជាមូលហេតុដែលអ្នកជំនាញផ្នែកសុខភាពបានចាប់ផ្តើមណែនាំឲ្យស្ត្រីមានផ្ទៃពោះទាំងឡាយផ្តល់កំណើតតាមទ្វារមាស ប្រសើរជាងវិធីផ្សេងៗទៀត(បើគ្មានករណីលើកលែងទេនោះ)។ កម្រិតអតិសុខុមប្រាណទាំងនោះ អាចកំំណត់ពីសុខភាពរបស់កុមារពេញមួយជីវិត នេះបើយោងតាមការសិក្សា៕