កាល់ស្យូម គឺជាសារធាតុរ៉ែ ដ៏មានសារៈសំខាន់បំផុតក្នុងការពង្រឹងឆ្អឹង និងធ្មេញឲ្យកាន់តែមានភាពរឹងមាំ។ មិនតែប៉ុណ្ណោះ វាក៏អាចចូលរួមក្នុងដំណើរការកំណកឈាម និងកន្ត្រាក់សាច់ដុំផងដែរ។ ស្ត្រីមានផ្ទៃពោះ ដែលខ្វះជាតិកាល់ស្យូម អាចបណ្តោលឲ្យមានការឈឺចាប់ ស្ពឹក និងអស់កម្លាំង ហើយចំណែកឯទារកអាចមានបញ្ហាឆ្អឹងលូតលាស់មិនបានល្អ។
ដូច្នេះ ដើម្បីជួយជំរុញឲ្យរាងកាយស្រូបយកជាតិកាល់ស្យូមបានកាន់តែច្រើនសម្រាប់បំពេញតម្រូវការអំឡុងពេលមានផ្ទៃពោះ ស្ត្រីទទួលទានបន្លែ៤ប្រភេទនេះឲ្យបានញឹកញាប់។
១.សណ្តែកបណ្តុះ
សណ្តែកបណ្តុះ ១០០ក្រាម មានផ្ទុកជាតិកាល់ស្យូមរហូតដល់ទៅ ៣៨ក្រាម និងវីតាមីនផ្សេងៗទៀតដូចជា វីតាមីន B2, B6, E, C…។ ជាពិសេសសមាធាតុគីមីពីរប្រភេទ គឺ phyto-oestrogens និង isoflavones ដែលអាចជួយបង្កើតឆ្អឹង កាត់បន្ថយអត្រាបាត់បង់ឆ្អឹង និងជួសជុលឆ្អឹងពុកឡើងវិញ។
២.ខាត់ណាផ្តាពណ៌ខៀវ
បន្លែមួយប្រភេទនេះផ្ទុកទៅដោយជាតិកាល់ស្យូម និងវីតាមីន A, C, K ដែលល្អបំផុតសម្រាប់ការអភិវឌ្ឍ និងការពារជំងឺពុកឆ្អឹង។
៣.ភ្លៅកង្កែប
បន្លែភ្លៅកង្កែប ផ្តល់នូវបរិមាណដ៏ច្រើននៃវីតាមីន K និងកាល់ស្យូមសម្រាប់ការលូតលាស់នៃឆ្អឹង។ លើសពីនេះ វាក៏មានសារធាតុ inositol, mannitol និង អាស៊ីតអាមីណូ ដែលអាចជួយពង្រឹងប្រព័ន្ធភាពស៊ាំ និងការពារជំងឺផ្សេងៗ។
៤.សណ្តែកបារាំង
ជម្រើសដ៏ល្អមួយទៀតសម្រាប់អ្នកម្តាយដែលចង់រក្សាឆ្អឹងឲ្យបានរឹងមាំ គឺសណ្តែកបារាំង ។ សណ្តែកបារាំង ១០០ក្រាម មានផ្ទុកជាតិកាល់ស្យូមរហូតដល់ទៅ ៣៤៩មីលីក្រាម ច្រើនជាងសណ្តែកសៀងដល់ទៅ ២ដងឯណោះ។
សូមបញ្ជាក់ផងដែរថា បន្លែទាំងនេះត្រូវបានអ្នកវិទ្យាសាស្ត្រស្រាវជ្រាវរកឃើញថា វាមានផ្ទុកជាតិកាល់ស្យូម ច្រើនជាងបង្ការ ត្រី និងទឹកដោះគោទៅទៀត។ ហេតុនេះ ដើម្បីការពារកង្វះជាតិកាល់ស្យូម ក៏ដូចជាពង្រឹងឆ្អឹងឲ្យបានរឹងមាំល្អ ស្ត្រីមានផ្ទៃពោះគួរតែបន្ថែមបន្លែទាំងនេះទៅក្នុងរបបអាហារជាប្រចាំ៕
