ការទទួលទានរបបអាហារដែលសម្បូរសារធាតុចិញ្ចឹម ពិតជាមានសារៈសំខាន់ខ្លាំងណាស់ គ្រប់ដំណាក់កាលនៃការមានផ្ទៃពោះ។ ក៏ប៉ុន្តែក្រៅពីចង់ឲ្យកូនមានសុខភាពល្អ ហើយឆ្លាតលើសគេ ឪពុកម្តាយភាគច្រើនតែងតែចង់ឲ្យកូនរបស់ខ្លួនមានស្បែកសស្អាត និងថ្លោះ ថែមទៀត។ តើធ្វើដូចម្តេចទៅ ដើម្បីសម្រេចបំណងមួយនេះ? បើយោងតាមអ្នកជំនាញបាននិយាយថា ប្រសិនបើអ្នកម្តាយព្យាយាមទទួលទានផ្លែឈើធម្មជាតិមួយចំនួន ជាពិសេសនៅខែចុងក្រោយ ទារកនឹងមានស្បែកសស្អាត ហើយថ្លោះ ថែមទៀត។
ក្រូច
គ្រប់ប្រភេទនៃផ្លែក្រូចដូចជា ក្រូចពោសាធិ៍ ក្រូចឃ្វិច ក្រូចថ្លុង ក្រូចឆ្មារ… ជាផ្លែឈើដែលស្ត្រីមានផ្ទៃពោះគួរទទួលទាននៅត្រីមាសចុងក្រោយ។ ព្រោះផ្លែឈើទាំងនេះ សម្បូរទៅដោយវីតាមីន C ដែលអាចជួយស្រូបយកជាតិដែក កាល់ស្យូម ជំរុញឲ្យទារកលូតលាស់បានល្អ និងការពារបញ្ហាកើតមិនគ្រប់ខែ។
ចេក
ចេក ជាផ្លែឈើធម្មជាតិដែលសម្បូរទៅដោយជាតិសរសៃខ្ពស់ ដែលអាចជួយសម្រួលដល់ប្រព័ន្ធរំលាយអាហារ ទប់ស្កាត់បញ្ហាទល់លាមក។ លើសពីនេះ វាក៏មានផ្ទុកប៉ូតាស្យូម ដែលអាចជួយរក្សាស្ថិរភាពសម្ពាធឈាម ផ្តល់សារធាតុចិញ្ចឹម និងអុកស៊ីសែន ទៅកាន់ទារកបានយ៉ាងល្អ។
ល្ហុង
ល្ហុង ក៏ជាផ្លែឈើធម្មជាតិដែលសម្បូរទៅដោយជាតិសរសៃដូចផ្លែចេក ដែរ ប៉ុន្តែល្ហុងមានផ្ទុកវីតាមីន A វីតាមីន C ជាតិដែក និងកាល់ស្យូម ដែលជាសារធាតុចិញ្ចឹមចាំបាច់ដែលទារកត្រូវការបំផុតក្នុងខែចុងក្រោយ។
ទឹកដូង
ទឹកដូង មិនត្រឹមតែជាភេសជ្ជៈដ៏ពេញនិយមសម្រាប់មនុស្សគ្រប់រូបនារដូវក្តៅនោះទេ សូម្បីតែស្ត្រីមានផ្ទៃពោះ ក៏ត្រូវការដូចគ្នាដែរ។ ការទទួលទានទឹកដូង បានទៀងទាត់ អាចជួយឲ្យរាងកាយទារកលូតលាស់បានល្អ និងធ្វើឲ្យមានស្បែកស្អាតពីកំណើត៕
