ម្តាយមានផ្ទៃពោះជាច្រើនតែងតែទទួលរងពីបញ្ហាទល់លាមក ធ្វើឲ្យពិបាកក្នុងការបញ្ចេញចោល ហើយនៅពេលប្រឹងម្តងធ្វើឲ្យមានការឈឺចាប់ ឬដាច់រហែកតំបន់គូថក៏មានដែរ។
ការទល់លាមកពិតជាពិបាកជៀសវាងណាស់សម្រាប់ស្ត្រីមានផ្ទៃពោះ ដោយសារតែការផ្លាស់ប្តូររាងកាយនៅពេលស្បូនរីកកាន់តែធំ ធំរហូតដល់ដាក់សម្ពាធទៅលើប្លោកនោម និងពោះវៀនធំ ដែលជាតំបន់ត្រូវបញ្ចូនកាកសំណល់ឆ្លងកាត់បានស្រួល។ តែនៅពេលការសម្រាលជិតមកដល់ ទំហំប្លោកនោម និងពោះវៀនធំកាន់តែរួមតូច ធ្វើឲ្យអ្នកម្តាយភាគច្រើនមានការទល់លាមក។
ហេតុនេះស្ត្រីមានផ្ទៃពោះត្រូវការរកវិធីដោះស្រាយ ដើម្បីធ្វើឲ្យលាមកទន់ងាយស្រួលក្នុងការបញ្ចេញចោល។ ជំនួយដ៏ល្អបំផុត គឺការទទួលទានអាហារដែលងាយរំលាយ និងសម្បូរជាតិសរសៃច្រើន។
១.បន្លែបៃតងគ្រប់ប្រភេទ
បន្លែបៃតងមិនត្រឹមតែល្អសម្រាប់រាងកាយនោះទេ សូម្បីតែប្រព័ន្ធរំលាយអាហារក៏ដូចគ្នាដែរ។ ដោយសារតែបន្លែបៃតងសម្បូរសារធាតុចិញ្ចឹម ដូចជាជាតិសរសៃ ធ្វើឲ្យលាមកទន់ ហើយស្ត្រីមានផ្ទៃពោះមិនពិបាកក្នុងការបញ្ចេញចោលនោះទេ។
២.ផ្លែឈើ
មិនថាចេកទុំ ល្ហុងទុំ ក្រូច ត្របែក ផ្លែប៉ោមនោះទេ សុទ្ធតែសម្បូរជាតិសរសៃ ដែលអាចជួយឲ្យស្ត្រីមានផ្ទៃពោះបត់ជើងមកស្រួល។ ប៉ុន្តែត្រូវប្រយ័ត្ន ចំពោះផ្លែឈើមួយចំនួន ព្រោះវាមានជាតិផ្អែមខ្លាំង ដែលអាចធ្វើឲ្យអ្នកម្តាយនឹងនឹងធាត់។
៣.ទឹកផ្លែឈើស្រស់
ប្រភេទទឹកផ្លែឈើស្រស់ៗអាចផ្តល់សារធាតុចិញ្ចឹមចាំបាច់ដែលទារកត្រូវការ ហើយអាចជួយឲ្យអ្នកម្តាយបន្ទោរបង់ស្រួលផងដែរ។ ឧទាហរណ៍ទឹកក្រូចច្របាច់ គឺជាជម្រើសដ៏ល្អបំផុតសម្រាប់អ្នកម្តាយដែលចង់គេចផុតពីបញ្ហាទល់លាមក។
៤.ទឹកដោះគោជូរ
ប្រសិនបើអ្នកម្តាយធុញជាមួយនឹងផ្លែឈើ ពួកគេអាចប្តូរមកញ៉ាំទឹកដោះគោជូរវិញបាន ព្រោះវាក៏អាចជួយបន្ទន់លាមក ហើយអ្នកម្តាយក៏មានសុខភាពល្អផងដែរ។
៥.គ្រាប់ធញ្ញជាតិ
អង្ករសំរូប និងស្រូវលាសី គឺជាគ្រាប់ធញ្ញជាតិដែលល្អបំផុតសម្រាប់អ្នកម្តាយដែលចង់ជៀសឆ្ងាយពីបញ្ហាទល់លាមក។ ព្រោះវាសម្បូរជាតិសរសៃ និងសារធាតុចិញ្ចឹមចាំបាច់ជាច្រើនដែលរាងកាយត្រូវការ។
អ្នកម្តាយគ្រប់រូបត្រូវដឹងថា ការបណ្តោលឲ្យបញ្ហាទល់លាមកនេះកើតឡើងជារឿយៗ ជំងឺឬសដូងបាតនឹងកើតឡើង។ ដូច្នេះប្រសិនបើអ្នកម្តាយពិបាកបត់ជើងខ្លាំង ឬមានបញ្ហាទល់លាមកធ្ងន់ធ្ងរ ចាំបាច់ត្រូវពិគ្រោះជាមួយគ្រូពេទញយជាបន្ទាន់៕
