បញ្ហាសុខភាពដែលអាចកើតមានឡើងចំពោះអ្នកម្តាយនៅវ័យក្មេង គឺងាយនឹងមានភាពស្លេកស្លាំងជាងធម្មតា។ ដោយសារតែរាងកាយនៅមិនទាន់លូតលាស់បានពេញលេញ និងរៀបចំខ្លួនរួចរាល់ក្នុងការមានកូន។ រាងកាយខ្វះជីវជាតិ ជាពិសេសជាតិដែក នៅក្នុងពេលមានផ្ទៃពោះ ធ្វើឲ្យកំហាប់ឈាមថយចុះ អាចបណ្តោលឲ្យមានភាពស្លេកស្លាំងអំឡុងពេលមានផ្ទៃពោះ។
ភាពស្លេកស្លាំងបណ្តោលមកពីកង្វះជាតិដែកនៅក្នុងខ្លួន បណ្តោលឲ្យមានកោសិកាឈាមក្រហមតិចជាងធម្មតា ជាលទ្ធផលអុកស៊ីសែនដែលត្រូវបញ្ចូនទៅសរីរាង្គ និងស្បូនដំណើរការមិនបានល្អ។ លើសពីនេះ វាអាចប៉ះពាល់ដល់ទារកមិនទាន់កើត ប្រសិនបើអ្នកម្តាយវ័យក្មេងមានភាពស្លេកស្លាំង ច្រើនជួបផលវិបាកគឺ៖
១.ឱកាសនៃកើតមិនគ្រប់ខែ ទារកមានទម្ងន់ស្រាល ឬមានសុខភាពទន់ខ្សោយ។
២.ទារកស្ថិតនៅក្នុងស្បូនយូរជាងធម្មតា ដោយសារតែស្បូនកន្ត្រាក់មិនបានល្អ។
៣.ប្រសិនបើស្ថានភាពធ្ងន់ធ្ងរ ការហូរឈាមអាចកើតឡើងក្នុងអំឡុងពេលសម្រាលកូន ឬទារកមានពិការភាពពីកំណើត។
ដូច្នេះការងាកទៅរកការថែទាំងសុខភាព គឺជាអ្វីដែលជួយឲ្យស្ត្រីមានផ្ទៃពោះវ័យក្មេងឆ្លងកាត់ការមានផ្ទៃពោះប្រកបដោយផាសុខភាព។
រោគសញ្ញានៃភាពស្លេកស្លាំង
ម្តាយវ័យក្មេងដែលមានភាពស្លេកស្លាំងភាគច្រើនបង្ហាញរោគសញ្ញាដូចជា៖
មានមុខមាត់ស្លេក
អស់កម្លាំង
បេះដូងលោតមិនទៀងទាត់
វិលមុខ និងដួលសន្លប់ជាញឹកញាប់។
ប្រសិនបើមានរោគសញ្ញាបែបនេះ អ្នកម្តាយគួរតែពិគ្រោះជាមួយគ្រូពេទ្យ ដើម្បីទទួលបានការណែនាំពីវិធីដោះស្រាយដែលត្រឹមត្រូវ។
ដូច្នេះ ដើម្បីឲ្យការមានផ្ទៃពោះដំណើរការបានល្អ អ្នកម្តាយគួរតែព្យាយាមញ៉ាំអាហារដែលសម្បូរជាតិដែក សម្រាកឲ្យបានគ្រប់គ្រាន់ ណាត់ជួបគ្រូពេទ្យឲ្យទៀងទាត់ និងលេបថ្នាំជំនួយជាតិដែកតាមវេជ្ជបញ្ជារបស់គ្រូពេទ្យ៕