ទង្វើ 5 យ៉ាង​ ​ស្ត្រី​មានគភ៌​ហាមធ្វើ​ក្រោយពេល​ទទួលទាន​អាហារ​រួច

0

ស្ត្រី​មានគភ៌​ទាំងឡាយ​ធ្លាប់ធ្វើ​ដែរ​ទេ នៅពេលដែល​​ញ៉ាំ​អាហារឆ្អែតៗហើយ រឿង​ដំបូង​ដែល​​ចង់​ធ្វើ​នោះ​គឺ គេង​លេង​មើល​ទូរទស្សន៍ ឬ​​ក៏​ទៅ​ងូតទឹក​ឱ្យ​ត្រជាក់​កាយ​សប្បាយចិត្ត។​ ប៉ុន្តែ តើ​អ្នកដឹង​ឬទេ​ថា ទង្វើ​ខ្លះ​ក្រោយពេល​ទទួលទាន​អាហារ​រួច​អ្នក​មិនគួរ​ធ្វើ​នោះ ព្រោះវា​អាច​នាំមក​នូវ​គ្រោះថ្នាក់​ដល់​សុខភាព​។

១. មិនគួរ​ងូតទឹក
សម្រាប់​ស្ត្រី​មាន​ផ្ទៃពោះ ឬ​មនុស្ស​ជាច្រើន​ដែលមាន​ទង្វើ​ចូលចិត្ត​ងូតទឹកភ្លាមៗក្រោយពេល​ទទួលទាន​អាហារ​រួច​នោះ គួរតែ​កែសម្រួល​ទង្វើ​នោះ​ជាថ្មី​ហើយ ព្រោះ​ការ​ងូតទឹកភ្លាមៗក្រោយពេល​ទទួលទាន​អាហារ​ឆ្អែត​នឹង​បន្ថយ​ប្រសិទ្ធភាព​ការធ្វើការងារ​របស់​ប្រព័ន្ធ​រំលាយ​អាហារ តែ​អ្វីដែល​សំខាន់​នោះ វា​នៅ​ហុច​ផល​ធ្វើឱ្យ​ប្រព័ន្ធ​ឈាម​រត់​នៅក្នុង​រាងកាយ​កើត​ភាពមិន​តុល្យ​ការឡើង​ទៀតផង ដូច្នេះ យើង​សូម​ណែនាំ​ថា ក្រោយពេល​ទទួលទាន​អាហារ​រួចហើយ គួរ​សម្រាក​ប្រមាណ​ជា ៣០ នាទី ហើយ​សឹម​ងូតទឹក ទើប​វា​ហុច​ផល​ល្អ​ដល់​សុខភាព​ខ្លាំង​ជាង។

២. មិនគួរ​ទទួលទាន​ផ្លែឈើ
ក្រោយពី​ទទួលទាន​បាយ​ឆ្អែត​ហើយ ភាគច្រើន​យើង​ច្រើនតែ​រក​ផ្លែឈើ​មក​ញ៉ាំ​លាង​មាត់ មែន​ទេ​ចា៎ស? តែបងស្រីៗដែល​កំពុងមាន​ផ្ទៃពោះ​ដឹង​ទេ​ថា ផ្លែឈើ​ដែល​យើង​ញ៉ាំ​ចូលទៅភ្លាមៗបន្ទាប់ពី​ញ៉ាំ​បាយ​ឆ្អែត​ហើយ​នោះ នឹងធ្វើ​ឱ្យ​កើត​ជាតិ​អាស៊ីត​កើនឡើង​នៅក្នុង​ក្រពះ និង​កើតការ​ចុក​ឆ្អល់​ណែន​ក្នុង​ពោះ​ខ្លាំង​ជា​អ្នក​ដែល​មិន​មានគភ៌ ធ្វើឱ្យ​មិន​ស្រួល​ក្នុង​ខ្លួន ដូច្នេះ យើង​សូម​ណែនាំ​ថា ចូរ​ញ៉ាំ​ផ្លែឈើ​ក្រោយពេល​ទទួលទាន​អាហារ​រួចហើយ ១ឬ ២ ម៉ោង​ក្រោយ​ទើប​ជាការ​ប្រសើរ។

៣. មិនគួរ​ញ៉ាំ​ទឹកតែ
បន្ទាប់ពី​ញ៉ាំ​បាយ​ឆ្អែត​ហើយ យើង​មិន​ណែនាំ​ឱ្យ​ញ៉ាំ​ទឹកតែ​ទេ ព្រោះ​ស្លឹក​តែមាន​ភាពជា​អាស៊ីត​ខ្ពស់ នៅពេល​ទឹកតែ​ដែលញ៉ាំ​ចូលទៅ​នោះ វា​នឹង​ទៅ​មានប្រតិកម្ម​ម្យ៉ាង​ជាមួយ​អាហារ​ធ្វើឱ្យ​ប្រូតេអ៊ីន​ក្នុង​អាហារ​កើត​ភាពមិន​សមប្រកប​ឡើង ហុច​ផល​ឱ្យ​ក្រពះ​ពិបាក​ក្នុង​ការរំលាយ​អាហារ​កាន់តែខ្លាំង​ឡើង។

៤. មិនគួរ​ដើរ​ច្រើន
ជឿថា ក្រោយពី​ទទួលទាន​អាហារ​ឆ្អែត​ហើយ មិនមែន​ចំពោះតែ​ស្ត្រី​មាន​ផ្ទៃពោះ​ប៉ុណ្ណោះ​ទេ​ដែល​ចូលចិត្ត​ក្រោក​ឡើង​ចេញទៅ​ដើរ​ដើម្បី​រំលាយ​អាហារ ព្រោះ​នៅលើ​មនុស្ស​ទូទៅ​ច្រើន​តែមាន​ទង្វើ​បែបនេះ​ដែរ ដែល​នៅក្នុង​ការពិត​វិញ ការទទួល​ទាន​អាហារ​រួចហើយ​ដើរ មិនបាន​ជួយ​ធ្វើឱ្យ​អាហារ​រំលាយ​បាន​ងាយ និង​លឿន​ឡើង​នោះទេ តែ​ការដើរ​ក្រោយពេល​ញ៉ាំ​បាយ​ឆ្អែត​ហើយ ក្រៅពី​ធ្វើឱ្យមាន​អាការ​ចុក​ណែន​ក្នុង​ពោះ​ហើយ​នោះ វា​នៅ​ធ្វើឱ្យ​ប្រព័ន្ធ​រំលាយ​អាហារ​មិនអាច​បឺត​ជ្រាប​យក​សារធាតុ​អាហារ​ចូលទៅក្នុង​រាងកាយ​បានល្អ​ដូច​តាមតែ​អាចធ្វើ​បាន​នោះឡើយ ដូច្នេះ​ក្រោយពេល​ទទួលទាន​អាហារ​ឆ្អែត​ហើយ មិនគួរ​ក្រោក​ឡើងទៅ​ដើរ​រំលាយ​អាហារ​នោះទេ គួរ​រង់ចាំ​យ៉ាងតិច​ប្រមាណ​ជា ២០ទៅ៣០ នាទី រួចហើយ​សឹម​ក្រោក​ទៅដើរលេងៗកំសាន្ត​កាយ។

៥. មិនគួរ​គេង​លក់​ឱ្យ​ភ្លាម​ឡើយ
ញ៉ាំឆ្អែតៗហើយ អ្នកណាៗក៏​ចង់តែ​ទម្រេត​ខ្លួន​គេងភ្លាមៗដែរ មែន​ទេ? ពិសេស​រឹតតែ​ជា​ស្ត្រី​មានគភ៌​ផង​នោះ រឹតតែ​ចង់​ធ្វើ​បែប​នោះ​ទៅទៀត តែ​ឈប់​សិន! ព្រោះ​ការ​គេង​លក់ភ្លាមៗក្រោយពេល​ញ៉ាំ​បាយ​រួចហើយ នឹងធ្វើ​ឱ្យ​អាហារ​ដែល​ញ៉ាំ​ចូលទៅ​មិនកើត​មានការ​រំលាយ ព្រោះ​មិនមែន​គ្រាន់តែ​យើង​សម្រាក​ប៉ុណ្ណោះ​ទេ តែ​អវយវៈ​ខាងក្នុងផ្សេងៗក៏​សម្រាក​ដូចគ្នា ធ្វើឱ្យ​ប្រសិទ្ធភាព​ក្នុងការ​ធ្វើការ​យឺតយ៉ាវ​ចុះ(បេះដូង​នៅតែ​ដើរ​ដូច​មុន តែ​ជា​ការដើរ​ក្នុង​ចង្វាក់​ដែល​យឺត​ជាង​មុន) ដែលមាន​ទាំង​ប្រព័ន្ធ​រំលាយ​អាហារ​ផងដែរ។ ការដែល​អាហារ​មិន​ទទួល​ការរំលាយ​នោះ ធ្វើឱ្យ​អាហារ​ត្រូវបាន​ប្រមូល​សន្សំ​នៅក្នុង​ក្រពះ និង​ធ្វើឱ្យ​កើតមាន​ខ្យល់ កើតមាន​ហ្កា​ស​ឡើង​នៅក្នុង​ក្រពះ អាច​ហុច​ផល​ឱ្យ​កើតរោគ​អាស៊ីត​ហូរ​បញ្ច្រាស់​ឡើង​បាន៕