ទារកទើបនឹងកើតដំបូងនៅមានភាពទន់ខ្សោយខ្លាំងណាស់ ឪពុកអ្នកម្តាយត្រូវមើលថែទាំដោយយកចិត្តទុកដាក់ឲ្យបានខ្លាំង ដើម្បីសុខភាព និងការអភិវឌ្ឍដ៏ល្អរបស់កូនជាទីស្រឡាញ់។ ជាពិសេសខាងក្រោមនេះ គឺជាទង្វើដែលឪពុកម្តាយថ្មោងថ្មី មិនគួរធ្វើជាដាច់ខាត ដើម្បីសុវត្ថិភាពចំពោះកូនទើបនឹងកើត។
១.កុំទាន់នាំកូនទៅដើរលេងក្រៅផ្ទះ
ទារកក្នុងវ័យនេះ ប្រព័ន្ធការពាររាងកាយនៅធ្វើការមិនទាន់ពេញលេញឥតខ្ចោះនៅឡើយទេ ថែមទាំងនៅមិនទាន់បានទទួលវ៉ាក់សាំងការពារជំងឺ និងរោគផ្សេងៗឡើយ។ ការនាំទារកទៅនៅក្នុងទីកន្លែងដែលពេញទៅដោយល្អងធូលីដី ឬខ្យល់អាកាសពុលជាដើមនោះ អាចប្រថុយប្រថាននឹងការឆ្លងមេរោគ និងអាចឈឺថ្កាត់បានយ៉ាងងាយ។ គួរឱ្យទារកសំងំនៅក្នុងផ្ទះសិន ដើម្បីសាងប្រព័ន្ធការពាររាងកាយឱ្យរឹងមាំ មុននឹងចេញប្រឈមនឹងពិភពខាងក្រៅ ហើយចូរស្ថិតនៅក្នុងទីកន្លែងដែលមានសុវត្ថិភាពជានិច្ច។
២.កុំឱ្យកូនញ៉ាំអ្វីផ្សេងក្រៅពីទឹកដោះ
អាហារចម្បងតែមួយគត់សម្រាប់ទារកទើបកើតដំបូង គឺទឹកដោះម្តាយ ព្រោះក្រពះអាហារ និងពោះវៀនទារក នៅមិនទាន់ត្រៀមខ្លួនក្នុងការទទួលអាហារផ្សេងបានឡើយ។ ប្រសិនបើកូនញ៉ាំចូលទៅក្នុងពោះ អាចបណ្តោលឲ្យរាករូស និងឈឺថ្កាត់បាន។ ចំណែកឯអាហារបន្ថែមអាចចាប់ផ្តើមឱ្យញ៉ាំបាននៅពេលទារកមានអាយុគ្រប់ 6ខែ គឺនៅពេលដែលប្រព័ន្ធរំលាយអាហាររបស់ពួកគេបានត្រៀមរួចហើយ។
៣.កុំប្រើផលិតផលសម្រាប់មនុស្សធំ
ស្បែករបស់ទារកទើបនឹងកើត មានសភាពស្តើងថ្លាដូចស្លាបសត្វកន្តុំរុយ រហូតអាចមើលឃើញសរសៃឈាមនៅខាងក្នុងបានយ៉ាងច្បាស់។ មិនតែប៉ុណ្ណោះនៅលើស្បែកគ្មានមេរោគបាក់តេរី ដែលជួយការពារមេរោគពីខាងក្រៅបានដូចមនុស្សធំឡើយ ទើបធ្វើឲ្យស្បែកពួកគេមានឱកាសប្រតិកម្មយ៉ាងងាយ។ ដូច្នេះ ការជ្រើសរើសផលិតផលសម្រាប់ទារក ដូចជាសាប៊ូដុសខ្លួន ឬសាប៊ូលាងសម្អាតឧបករណ៍ប្រើប្រាស់របស់ទារក ក៏សំខាន់ណាស់ដែរ ដើម្បីការពារការរលាក ឬប្រតិកម្ម។
៤.កុំឆាប់លើកកូនពរពេក
ឆ្អឹង ឬសន្លាក់របស់កូនទើបកើតដំបូង នៅមិនទាន់រឹងមាំនៅឡើយ អាចនិយាយបានថានៅទន់ជ្រាយ និងមានឱកាសវៀចបានយ៉ាងងាយ ថែមទាំងនៅមិនទាន់អាចទ្រាំទ្របាននឹងកម្លាំងបោកប៉ះ សង្កត់ ឬទាញបានឡើយ ជាពិសេសនៅលើផ្នែកដែលងាយបាក់ និងភ្លាត់គ្រេចញឹកញាប់បំផុតគឺ ឆ្អឹងដៃ ជើង បាតដៃ បាតជើង និងឆ្អឹងស្លាបប្រចៀវ។
ការពរ ឬលេងជាមួយកូនត្រូវតែប្រយ័ត្នប្រយែងកន្លែងដែលមានសន្លាក់ត និងតំបន់ក ជាពិសេស។ ចំណែកឥរិយាបថគេងសម្រាប់ទារក គួរដាក់ឱ្យគេងផ្ងារ ដោយឱ្យដងខ្លួន ដៃ និងជើងព្រលែងឲ្យមានសេរីភាព មិនឱ្យមានផ្នែកណាមួយត្រូវសង្កត់ ឬកោងឡើយ។
៥.កុំចាប់អង្រួន បោះ ឬចាប់យោលខ្លាំងៗ
ខួរក្បាលរបស់កូនមួយខួបដំបូង នៅអភិវឌ្ឍមិនទាន់បានពេញទំហឹងទេ ទាំងសរសៃឈាមក៏មានឱកាសដាច់រហែកបានយ៉ាងងាយដែរ។ នៅក្នុងប្រអប់ខួរ មានទឹកច្រើនជាងសាច់ខួរក្បាល ប្រសិនបើមានការ រញ្ជួយខ្លាំងៗ ដូចជា ត្រូវអង្រួន ត្រូវយោល ចាប់បោះលើរួចចាំទ្រវិញ អាចធ្វើឲ្យសាច់ខួរក្បាលទៅបោកប៉ះនឹងឆ្អឹងលលាដ៍ក្បាល រហូតមានឈាមក្នុងខួរក្បាល ដែលអាការនេះនឹងប៉ះពាល់ដល់ការលូតលាស់របស់កូនបាន៕
