ការឆ្លងមេរោគផ្សិតច្រើនតែកើតមានចំពោះទារកនៅក្នុងវ័យ ៦ខែដំបូង ហើយវាកើតឡើងដោយសារតែប្រព័ន្ធភាពស៊ាំទារកនៅមានភាពទន់ខ្សោយ។ អ្នកជំនាញបាបង្ហាញថា មេរោគផ្សិតលូតលាស់នៅក្នុងបរិយាកាសក្តៅ និងមានសំណើម ជាពិសេសតំបន់បិទជិតដោយកន្ទប ឬខោទឹកនោម គឺជាទីតាំងដ៏ល្អបំផុតសម្រាប់ពួកវា។ មេរោគផ្សិតនេះអាចកើតនៅលើតំបន់នៃរាងកាយទារកដូចជា គូថ ក្រលៀន ក មាត់ ក្លៀក…ជាដើម។
ការមិនបានព្យាបាលត្រឹមត្រូវ មេរោគផ្សិតអាចកើតឡើងម្តងហើយម្តងទៀត និងធ្វើឲ្យប្រព័ន្ធភាពស៊ាំកុមារមានភាពទន់ខ្សោយកាន់តែខ្លាំង។ ដូច្នេះអ្នកគួរតែប្រញាប់ធ្វើការព្យាបាលឲ្យបានត្រឹមត្រូវ។
ការព្យាបាលការឆ្លងមេរោគផ្សិត
អ្នកឯកទេសជំងឺកុមារ លោកវេជ្ជបណ្ឌិត Leah Alexander បាននិយាយថា ការឆ្លងមេរោគផ្សិតចំពោះទារក មិនងាយដោះស្រាយដោយខ្លួនឯងទេ ហើយត្រូវការព្យាបាលដោយប្រើក្រែមប្រឆាំងនឹងផ្សិត ដែលលាប២ទៅ៤ដងក្នុងមួយថ្ងៃ។
ក្រែមប្រឆាំងនឹងផ្សិតដែលមានផ្ទុកសារធាតុ miconazole និង zinc oxide មានប្រសិទ្ធភាព និងមានសុវត្ថិភាពក្នុងការព្យាបាលជំងឺផ្សិតចំពោះទារក។ អ្នកមិនអាចទិញក្រែមដោយគ្មានវេជ្ជបញ្ជានោះទេ ហើយក៏មិនគួរប្រើលើទារកអាយុតិចជាង ៤សប្តាហ៍ដែរ។
Alexander បន្ថែមទៀតថា អ្នកអាចសម្គាល់ឃើញមានភាពប្រសើរឡើងក្នុងរយៈពេល ២៤ម៉ោងនៃការចាប់ផ្តើមព្យាបាល។
ក្រៅពីនេះអ្នកអាចសាកល្បងវិធីមួយចំនួន ដើម្បីកាត់បន្ថយរោគសញ្ញា និងការការពារការឆ្លងមេរោគធ្ងន់ធ្ងរ៖
១.រក្សាតំបន់ដែលមានមេរោគឲ្យស្អាត ហើយព្យាយាមជូតសំណើមចេញពីតំបន់ឆ្លងមេរោគឲ្យញឹកញាប់។
២.ប្រសិនបើការបង្ករោគស្ថិតនៅក្នុងតំបន់កន្ទប់ សូមទុកឲ្យខ្លួនកូនមានពេលទំនេរខ្លះ ដើម្បីឲ្យតំបន់នោះមានខ្យល់ចេញចូលបានល្អ។
៣.នៅពេលដែលអ្នកដឹងថាកូនមានការឆ្លងមេរោគផ្សិត កុំស្លៀកកន្ទប់ ឬខោទឹកនោមឲ្យកូន ព្រោះវាអាចធ្វើឲ្យស្បែកទារកមានបញ្ហាកាន់តែខ្លាំង៕
