ការមានផ្ទៃពោះ ស្ត្រីគ្រប់រូបមិនអាចមានសុខភាពល្អដូចគ្នាៗនោះទេ។ ក្នុងនោះផងដែរអត្រាមរណៈភាពរបស់អ្នកម្តាយ ឬអត្រាមរណភាពរបស់ទារក ត្រូវបានគេរកឃើញ ដោយសារតែមូលហេតុមួយចំនួនដូចជា ការធ្លាក់ឈាមក្រោយពេលសម្រាល ការរលាក ការឆ្លងមេរោគក្រោយពេលសម្រាល ជំងឺព្រាយក្រឡាភ្លើង ការរលូតកូន ការបែកធ្លាយទឹកភ្លោះចូលក្នុងចរន្តឈាម ជាដើម។
ដូច្នេះស្ត្រីត្រូវចេះបែងចែកថា តើការមានផ្ទៃពោះប្រភេទណាដែលមានគ្រោះថ្នាក់ខ្ពស់? វានឹងធ្វើឲ្យអ្នកមានការប្រុងប្រយ័ត្នខ្ពស់ ដើម្បីកាត់បន្ថយឱកាសនៃភាពមិនប្រក្រតី ដែលអាចនាំឲ្យមានគ្រោះថ្នាក់ទាំងម្តាយ និងកូន។ ខាងក្រោមនេះ គឺជាលក្ខខ័ណ្ឌមួយចំនួនដែលត្រូវបានគេចាត់ទុកថា មានគ្រោះថ្នាក់ខ្ពស់៖
១.អ្នកធ្លាប់មានប្រវត្តសម្រាលកូនមកស្លាប់អំឡុងពេលសម្រាល។
២.អ្នកមានប្រវត្តរលូតកូនយ៉ាងហោចណាស់ ២ដង។
៣.អ្នកធ្លាប់សម្រាលកូនមានទម្ងន់ស្រាល ឬតិចជាង ២៥០០ក្រាម។
៤.អ្នកមានប្រវត្តសម្រាលកូនដែលមានទម្ងន់លើស ៤០០០ក្រាម។
៥.អ្នកធ្លាប់មានជំងឺព្រាយក្រឡាភ្លើង ឬឡើងឈាមមុនពេលមានផ្ទៃពោះ។
៦.អ្នកធ្លាប់មានប្រវត្តវះកាត់ស្បូន ឬសរីរាង្គបន្តពូជ។
៧.ការពពោះកូនភ្លោះ ឬច្រើនជាងនេះ។
៨.ការពពោះទារកស្ថិតនៅក្នុងស្ថានភាពមិនប្រក្រតី ដូចជាទីតាំងបញ្ជ្រាស់ ឬនៅទទឹងពោះ។
៩.ស្ត្រីមានផ្ទៃពោះអាយុក្រោម ១៦ឆ្នាំ។
១០.ស្ត្រីមានផ្ទៃពោះដែលមានអាយុលើសពី ៤០ឆ្នាំ។
១១.ការហូរឈាមតាមទ្វារមាសខុសប្រក្រតីអំឡុងពេលមានផ្ទៃពោះ។
១២.ស្ត្រីដែលមានក្រុមឈាម Rh អវិជ្ជមាន (Rh អវិជ្ជមាន គឺជាប្រភេទឈាមដែលមិនមានប្រូតេអ៊ីននៅលើផ្ទៃកោសិកាឈាមក្រហម)។
១៣.ស្ត្រីដែលកើតមានដុំពតនៅតំបន់អាងត្រគាក អំឡុងពេលមានផ្ទៃពោះ។
១៤.ស្ត្រីមានជំងឺលើសឈាម ដែលមានសម្ពាធឈាមឡើងខ្ពស់។
១៥.ស្ត្រីមានជំងឺទឹកនោមផ្អែម ដែលពឹងផ្អែកទោលើអាំងស៊ុយលីន។
១៦.ស្ត្រីដែលមានជំងឺតម្រងនោម។
១៧.ស្ត្រីដែលមានជំងឺបេះដូង។
១៨.ស្ត្រីដែលញៀននឹងស្រា។
១៩.ស្ត្រីដែលមានជំងឺស្លេកស្លាំង ប្រព័ន្ធភាពស៊ាំចុះខ្សោយ។
២០.ស្ត្រីដែលឆ្លងជំងឺអេដស៍ ឬជំងឺផ្សេងផ្សេងៗ។
ប្រសិនបើស្ត្រីមានផ្ទៃពោះមានលក្ខខ័ណ្ឌដូចខាងលើនេះ ត្រូវបានបានគេចាត់ទុកថា មានហានិភ័យខ្ពស់ ដែលតម្រូវឲ្យតាមដានសុខភាពជាមួយអ្នកឯកទេសឲ្យបានញឹកញាប់៕
