ឪពុកម្តាយជាច្រើនតែងតែឃាំងរក្សាកូនតូចរបស់ខ្លួនពីការលេងសប្បាយនៅខាងក្រៅពេលដែលមានភ្លៀងធ្លាក់ ដោយជឿថាការលេងទឹកភ្លៀង នឹងធ្វើឱ្យកូនតូចរបស់ពួកគេងាយនឹងធ្លាក់ខ្លួនឈឺ ដូចជាជំងឺផ្តាសាយជាដើម។ ដូច្នេះតើការលេងទឹកភ្លៀងពិតជាអាក្រក់ និងអាចធ្វើឱ្យកូនតូចអ្នកឈឺមែនទេ?
តាមពិតទៅភ្លៀងមិនធ្វើឱ្យអ្នកណាម្នាក់ឈឺទេ តែមេរោគ និងបាក់តេរីទើបជាមូលហេតុដែលបង្កជាជំងឺ។ អ្វីដែលភ្លៀងបង្កនោះគឺ ធ្វើឱ្យសីតុណ្ហភាពនៃរាងកាយយើងធ្លាក់ចុះដែលធ្វើឱ្យយើងងាយនឹងឆ្លងមេរោគជាពិសេសគឺក្មេងៗ ដោយសារតែពួកគេមានប្រព័ន្ធភាពស៊ាំខ្សោយជាងមនុស្សធំ។ ប៉ុន្តែនេះមិនមាន ន័យថាដាច់ខាតអ្នកមិនគួរឱ្យកូនរបស់អ្នកលេងទឹកភ្លៀងឡើយ…
តាមគ្រូពេទ្យឯកទេសផ្នែកកុមារបានឱ្យដឹងថា ការលេងទឹកភ្លៀងក៏ដូចជាការរុករកស្វែងយល់ពីធម្មជាតិខាងក្រៅផ្សេងៗនៅជុំវិញយើង គឺមានប្រយោជន៍ដល់ការអភិវឌ្ឍសមត្ថភាពរាងកាយរបស់កុមារបានលឿនជាងមុន និងជួយដល់ការកសាងប្រព័ន្ធភាពស៊ាំរបស់ពួកគេបានល្អ និងរឹងមាំជាងមុន។
ប៉ុន្តែត្រូវចងចាំថា អាកាសធាតុត្រជាក់អាចធ្វើឱ្យប្រព័ន្ធភាពស៊ាំរបស់យើងចុះខ្សោយ ធ្វើឱ្យកុមារងាយនឹងឆ្លងមេរោគដែលបង្កឱ្យផ្តាសាយបានដូច្នេះ យើងក៏ចាំបាច់ត្រូវមានការប្រុងប្រយ័ត្នខ្លះៗ ដើម្បីធានាបានថាកូនៗរបស់អ្នកនឹងធ្លាក់ខ្លួនឈឺបន្ទាប់ពីលេងសប្បាយនៅក្រោមទឹកភ្លៀង ជាមួយនឹង៣គន្លឺះនេះ៖
ទី១៖ បង្កើនប្រព័ន្ធភាពស៊ាំរបស់កូន
ការបង្កើនប្រព័ន្ធភាពស៊ាំឱ្យរឹងមាំគឺជាវិធីដែលល្អបំផុតក្នុងការជួយឱ្យកុមារមានសុខភាពល្អ និងប្រឆាំងនឹងជំងឺផ្សេងៗ។ អ្នកអាចការបង្កើនប្រព័ន្ធភាពស៊ាំពួកគេដោយឱ្យកូនរបស់អ្នក
- គេងឱ្យបានគ្រប់គ្រាន់
- ទទួលទានពពួកអាហារដែលសម្បូរជីវជាតិបំប៉ន ជាតិដែក រ៉ែ និងសារធាតុប្រឆាំងអុកស៊ីតកម្ម និងប្រភេទផលិតផលអាហារបំប៉នដែលជួយបង្កើនប្រព័ន្ធភាពស៊ាំដូចជា វីតាមីនC និងចៀសវាងនំចំណីដែលសម្បូរជាតិស្ករច្រើន
- ក្រៅពីនេះអ្នកគួរតែឱ្យពួកគេ លេងនៅខាងក្រៅផ្ទះដែលប្រលូកប្រលាក់ទៅនឹងភាពកខ្វក់បន្តិចបន្តួច គឺពិតជាមានប្រយោជន៍ ហើយក៏ជួយឱ្យពួកគេទទួលបានវីតាមីន D បន្ថែមទៀតនៅក្នុងខ្លួន
២៖ ពាក់អាវភ្លៀងឱ្យកូនតូចពេលលេងទឹកភ្លៀង
អ្នកអាចឱ្យកូនអ្នកលេងទឹកភ្លៀងសប្បាយនៅខាងក្រៅបាន ដោយធ្វើឱ្យច្បាស់ថាពួកគេបានពាក់អាវភ្លៀង ឬមានស្បែកជើងកវែងដែលមិនជ្រាបទឺកបន្ថែមទៀតរឹតតែល្អ ព្រោះការលេងទឹកភ្លៀងជាមួយនឹងសម្លៀកបំពាក់ធម្មតាដែលធ្វើឱ្យពួកគេសើមទទឹកខ្លួន នឺងធ្វើឱ្យឆាប់រងារ ហើយសីតុណ្ណភាពក្នុងខ្លួនធា្លក់ចុះលឿនខ្លាំង
ទី៣៖ ងងូតទឹកជាមួយទឹកក្តៅអ៊ុនៗឱ្យកូនរបស់អ្នកបន្ទាប់ពីលេងរួច
បន្ទាប់ពីពួកគេលេងចប់ហើយភ្លាម ឆាប់សម្ងួតខ្លួនពួកគេសិនហើយងូតទឹកក្តៅអ៊ុនៗឱ្យពួកគេភ្លាមៗ ធ្វើដូចនេះគឺមិនធ្វើឱ្យពួកគេរងារយូរពេកទេដើម្បីឱ្យរាងកាយរបស់ពួកគេអាចសម្របខ្លួនមកសីតុណ្ហភាពធម្មតាវិញបានយ៉ាងងាយស្រួល៕
